Na’e lava atu ‘a e CEO, Makahokovalu Pailate, mo e Sekelitali ‘o e Poate ‘Ākiheuho, Manase Lua Pakilau ‘o Aotearoa, ‘o tali e pale fakalangilangi ne foaki ‘e he 𝑯𝒐𝒓𝒕𝒊𝒄𝒖𝒍𝒕𝒖𝒓𝒆 𝑵𝒆𝒘 𝒁𝒆𝒂𝒍𝒂𝒏𝒅 ko e fakahounga’i e tokoni na’e fakahoko mo fakaa’u ‘e he ‘Ākiheuhó mo e Aotearoa Tongan Response Group (ATRG) ki he kau ngāue RSE Tonga ne nau uesia ‘i he tāfea lolotonga e saikolone Gabrielle ne ma’ukovia ai e konga lahi ‘o e motu noate ‘o NZ ni ‘i Fepueli 2023.
Ko e foaki pale fakalangilangi ko ení ne fakahoko ia ‘i he konifelenisi fakata’u ‘a e 𝑯𝒐𝒓𝒕𝒊𝒄𝒖𝒍𝒕𝒖𝒓𝒆 𝑵𝒆𝒘 𝒁𝒆𝒂𝒍𝒂𝒏𝒅 mo e 𝑹𝒆𝒄𝒐𝒈𝒏𝒊𝒔𝒆𝒅 𝑺𝒆𝒂𝒔𝒐𝒏𝒂𝒍 𝑬𝒎𝒑𝒍𝒐𝒚𝒆𝒓𝒔 𝑺𝒄𝒉𝒆𝒎𝒆 (𝑹𝑺𝑬) ‘i Tauranga he ‘aho Tuapulelulu 29 ‘o ‘Akosi 2024. Ko e taumu’a ‘o e konifelenisi ni ke fakahounga’i, fakalangilangi’i, mo talanoa’i e ngaahi fakakaukau ki hono paotoloaki mo langa e fakalakalaka ‘o e sekitoa ngoue fua’i’akau he fonua ni.
Na’e hounga’ia mo fakamālō’ia ‘e he CEO ‘a e tokoni mei he ngaahi kupu fekau’aki na’a nau foaki e pa’anga, me’atokoni, vala mo e naunau nofo’anga ma’ae kau ngāue RSE Tonga ne ma’ungatāmaki kinautolu ‘e he tāfea. Takimu’a ai ‘a e 𝑷𝒂𝒔𝒊𝒇𝒊𝒌𝒂 𝑴𝒆𝒅𝒊𝒄𝒂𝒍 𝑨𝒔𝒔𝒐𝒄𝒊𝒂𝒕𝒊𝒐𝒏 mo e 𝑷𝒂𝒔𝒊𝒇𝒊𝒌𝒂 𝑭𝒖𝒕𝒖𝒓𝒆𝒔, 𝑻𝒂𝒓𝒐 𝑷𝒂𝒕𝒄𝒉 mo Vea Mafile’o, Pakilau mo e kau memipa ‘o e 𝑨𝑻𝑹𝑮, Sefita Hao’uli mo e kau ngāue ‘a e 𝑹𝑺𝑬 𝑻𝒐𝒏𝒈𝒂 𝑵𝒁, kaepehē ki he konga ‘o e kau ngāue ‘Ākiheuho ne nau lava atu ki Napier/Hastings ‘o fakaa’u ‘a e ‘ofá mo e tokoní.
Ko e taha eni e ngaahi makamaile mahu’inga kuo a’usia ‘e he kalia ‘Ākiheuho ‘i he ‘enau fua fatongia ‘oku fakahoko ma’ae komiunitī Tongá ‘i Nu’usila ni ‘o uho ‘aki e laumālie ngāue fakataha mo feongoongoi pea tāvani ai e faa’i kavei koula ‘a e Tongá ko e 𝑭𝒂𝒌𝒂’𝒂𝒑𝒂’𝒂𝒑𝒂, 𝑻𝒂𝒖𝒉𝒊 𝑽ā, 𝑴𝒂𝒎𝒂𝒉𝒊’𝒊 𝑴𝒆’𝒂 𝒎𝒐 𝒆 ‘𝑶𝒇𝒂 𝑭𝒐𝒏𝒖𝒂.
‘Io, ‘oku kei taaimu’a mo tu’u kalikali ai pe ‘a e ‘Ākiheuhó ‘i hono fatongiá he taimi kotoa.
𝑭𝒂𝒌𝒂𝒇𝒆𝒕𝒂’𝒊
Fetu’utaki mai ki he 09 276 6968 pe tu’asila 25 Princes Street Otahuhu Auckland ‘o ma’u mei ai e fakaikiiki ‘o e ngaahi sevesi ‘oku fakahoko ‘e he ‘Ākiheuho.
